रेखा र विराजबीच विवाद

पहिला खुबै मिल्ने नायिका रेखा थापा र नायक विराज भट्टबीच पछिल्लो चरणमा विवाद चर्कंदै गएको छ। उनीहरूबीच विवाद बढ्नुमा 'म के कम ?' भन्ने भावना कारक तत्त्व बनेको छ। विराज आफू केही फिल्मबाट निकालिनुमा रेखा नै दोषी देख्छन् भने रेखाचाहिँ आफूले स्थापित गरेको मान्छेले आफ्नैविरुद्ध कुरा काट्दै हिँडेको र अव्यावसायिक बेहोरा देखाएकाले रुष्ट भएको बताउँछिन्।

नायिका रेखाले अर्का नायक निखिल उप्रेतीसँग मनमुटाव भएपछि आफ्नो फिल्म हिम्मतमा विराजलाई नायक लिएकी थिइन्। हिम्मतपछि नै हो विराज नायकका रूपमा जमेका। त्यतिवेला रेखाले विराजको निकै सिफारिस गर्थिन्। तर, विराज यो कुरा भने मान्न तयार छैनन्। उनको भनाइ छ, 'रेखाको सिफारिसले मैले कुनै पनि फिल्म पाएको छैन। बरू मैले सिफारिस गरेर रेखालाई थुप्रै फिल्म दिलाएको छु।' रेखा भन्छिन्, 'कसैले नलिएको मान्छेलाई मैले रि-ब्रेक दिएँ। अहिले उसैका कुरा ठूला ? दुनियाँलाई थाहा छ, मैले विराजलाई कत्तिको सहयोग गरेकी छु भन्ने।'

किस्मत फिल्ममा रेखाले नयाँ हिरो आर्यन सिग्देललाई ब्रेक दिइन्। हिफाजतमा आर्यनसँगै आयुष रिजाललाई हिरो बनाइन। 'आफ्नो धरातल बिर्सने मान्छेलाई कति भाउ दिनू ?' विराजप्रति इंगित गर्दै रेखा भन्छिन्, 'त्यही भएर विकल्प खोजेकी हुँ। मैले ल्याएका आर्यन र आयुष विराजभन्दा कुनै कुरामा पनि कम छैनन्।' विराज रेखाको यो तर्क पनि मान्न तयार छैनन्। भन्छन्, 'निखिल र मजस्ता हिरो उनीसँग खेल्न नमानेपछि नयाँ हिरो त खोज्नै पर्‍यो नि! नयाँ भाइहरूसँग फिल्म खेलेर कहिले उँभो लाग्नू ?' रेखाको तर्क पनि दह्रो छ, 'यो वर्ष विराजले मसँग खेलेका बाटुली र आफ्नो मान्छे आफ्नै हुन्छ दुईटा फिल्म मात्र हिट भए। उनले अरूसँग खेलेका ११ वटा फिल्म फ्लप भएका छन्। त्यही भएर उनी मसँग फिल्म खेल्न लालायित छन्।'

केही समयअघिदेखि विराजले नायिकाको रूपमा जेनिशा केसीलाई सिफारिस गर्दै आएका छन् भने रेखाले आयुष र आर्यनको सिफारिस गर्ने गरेकी छिन्। २७ चैतदेखि रेखाको फिल्म हिफाजत मुलुकभरि एकैसाथ प्रदर्शन हुदै छ भने विराज र जेनिशा अभिनीत भागी भागी नजाऊ मोफसलका हलबाट प्रदर्शन हुँदै छ। नायिका रेखा हिफाजतबाट नायक आयुषलाई स्थापित गराउने धुनमा छिन् भने विराज भने भागी भागी नजाऊबाट नायिका जेनिशालाई स्थापित गराउन हरसम्भव प्रयासमा लागेका छन्।

हिफाजतमा रेखा र भागी भागी नजाऊमा जेनिशा सोलो हिरोइन छन्। विराज भन्ने गर्छन्, 'अब रेखाको टक्कर जेनिशासँग पर्ने भो। जेनिशाले सबै हिरोइनलाई खाइदिन्छे।' तर, रेखा भन्छिन्, 'मेरो टक्कर सीधै विराज भट्टसँग हो। अरूको मलाई मतलब छैन।' पछिल्ला दिनमा विराज र रेखाबीच विवाद बढ्नुको प्रमुख कारण हो यो।

विराजले आफू सडक, च्यालेन्ज, इसारालगायत फिल्मबाट निकालिनुलाई रेखाको षड्यन्त्र ठान्छन्। रेखा भने विराजले आफूलाई निराधार आरोप लगाउने गरेको बताउँछिन्। 'मैले कसैको पेटमा लात हानेको छैन,' उनी भन्छिन्, 'मैले त जहाँ पनि उनकै सपोर्टमा कुरा गर्ने गरेकी छु। उनी भ्रममा छन्।' विराज आफू नेपाली मात्र नभई भोजपुरी फिल्ममा समेत व्यस्त भएकाले 'आफँैले फिल्म छाडेको' बताउने गर्छन्