शरणार्थी सेरोफेरो

भुटानी शरणार्थी नेताहरुले शरणार्थी शिविरको विग्रदो सुरक्षास्थितिप्रति नेपाल सरकारको ध्यानाकर्षण गराएका छन् । शरणार्थी नेता टेकनाथ रिजाल, बलराम पौडेल, डिपि काफ्ले र लोकनाथ बस्नेत सहितको टोलीले शरणार्थी शिविरमा बढ्दो हत्याका घटनाकाबारे झापाका प्रमुख जिल्ला अधिकारी कुमार श्रेष्ठलाई हिजो भेटेर ध्यान आकर्षण गराएको हो । भेटघाटपछि प्रजिअ श्रेष्ठले शरणार्थी शिविरका समस्या केन्द्रिय स्तरसम्मै पुर्याएर सुरक्षा व्यवस्थामा सुधार ल्याउने र शरणार्थीका मामिलामा सम्वेदनशील भएर काम गर्ने प्रतिवद्धता व्यक्त गर्नु भएको छ । वैशाकयता दुइ शरणार्थीको शरणार्थी शिविरमै र एक जनाको शिविरबाहिर हत्या भइसकेको छ । गोलधाप शरणार्थी शिविरमा रहेका अपाङ्ग, अशक्त र मानसिक अवस्था कमजोर भएका बालबालिका र किशोर किशोरीलाई वौद्धिक क्षमताको विकास गर्न सिर्जना कक्षा चलाउन शुरु गरिएको छ । सात महिनाअघि खोलिएको सिर्जना कक्षामा आठ वर्षदेखि १६ बर्ष उमेर समूहका शरणार्थी वालवालिका र किशोर किशोरीलाई परामर्श दिइन्छ । वालवालिकालाई एकअर्कामा खुलेर बोल्न सक्ने, मेलमिलाप बढाउने लगायतका विषयमा परामर्श दिने गरिएको छ । मनोसामाजिक मनोविमर्श संघले खोलेका कक्षाका सहजकर्ता वासुदेव फुयाँल र निलकण्ठ फुयाँल हनुहुन्छ ।नेपालमा राणाशासन विरुद्धको समेत लडाईं लडेका भुटानी योद्धा भरत राई विरामी हुनु भएको छ । भुटानमा हुँदा मलेरिया उन्मुलन विभागको क्षेत्रिय अधिकारीका रुपमा समेत काम गर्नु भएका राई अहिले बेलडाँगी २ शरणार्थी शिविर सेक्टर आई ३ मा बस्नु हुन्छ । ८३ वर्षका राई उच्च रक्तचाप, हातगोडा दुख्ने लगायतका समस्याबाट पिडित हुनुहुन्छ । उहाँका परिबारमा १३ जना सदस्य छन् । वि.सं. २००७ सालअघि नेपाली कंग्रेसले बनाएको मुक्ति सेनामा समेत आवद्ध रहेका पूर्व व्रिटिश सैनिक राई पञ्चायत व्यवस्था आएपछि भारत हुँदै भुटान जानु भएको थियो । भुटानी शरणार्थीमध्ये अधिकाँशको पुस्ता नेपालका विभिन्न जिल्लाबाटै भुटान गएकाले उनीहरुलाई गएकाले उनीहरुलाई नेपाली मूलका भुटानी समेत भनिन्छ । राईका पूर्वज नेपालको भोजपुर जिल्लामा बसोबास गर्थे । उहाँको भुटानको घरचाहिँ सिसुममा थियो ।शरणार्थी युवाको क्षमता विकासका लागि दुइ दिने तालिम भएको छ । बेलडाँगी २ शरणार्थी शिवरमा भएको तालिममा सातै शरणार्थी शिविरका शिविरका प्रतिनिधी सहित स्थानिय युवाहरु समेत गरी २८ युवा सहभागि थिए । गएको आइतवार भएको तालिममा शरणार्थीको शैक्षिक सहायता संस्था कारितासका फादर सेल्विन राज स्रोत व्यक्ति हुनुहुन्थयो । तालिम कारितासले आयोजना गरेको थियो ।